(హైదరాబాద్/శుభ తెలంగాణ): రాష్ట్రవ్యాప్తంగా ఇసుక,ఇతర ఖనిజాల అక్రమ తవ్వకాలు, రవాణాపై ఉక్కుపాదం మోపాలని ముఖ్యమంత్రి ఏ. రేవంత్ రెడ్డి స్పష్టం చేశారు.అక్రమాలను అరికట్టడమే కాకుండా, ప్రభుత్వ ఆదాయాన్ని పెంచే విధంగా కఠిన చర్యలు తీసుకోవాలని అధికారులను ఆదేశించారు.
ఇంటిగ్రేటెడ్ కమాండ్ కంట్రోల్ సెంటర్ (ICCC) లో గనుల శాఖపై ముఖ్యమంత్రి సమీక్ష నిర్వహించారు.

గత నెల రోజుల్లో తీసుకున్న చర్యలతో అక్రమ రవాణా తగ్గిన తీరు, పెరిగిన ఆదాయాన్ని అధికారులు సీఎంకు వివరించారు.

ఇసుక తవ్వకాలు, రవాణా, వినియోగదారులకు తక్కువ ధరకు సరఫరా అంశాలపై ముఖ్యమంత్రి పలు సూచనలు ఇచ్చారు.

TGMDC ద్వారా మాత్రమే ఇసుక సరఫరా – అక్రమ రవాణాపై కఠిన చర్యలు

ప్రభుత్వ నిర్మాణ ప్రాజెక్టులు, పెద్ద నిర్మాణ సంస్థలకు అవసరమైన ఇసుకను తెలంగాణ ఖనిజాభివృద్ధి సంస్థ (TGMDC) ద్వారా మాత్రమే సరఫరా చేయాలని సీఎం స్పష్టం చేశారు.

హైదరాబాద్ నగరంతో పాటు ఇతర ప్రాంతాల్లో వినియోగదారులకు తక్కువ ధరకు ఇసుక అందించేందుకు నగరానికి మూడు వైపులా స్టాక్ పాయింట్లు ఏర్పాటు చేయాలని సూచించారు.

ప్రభుత్వమే సరైన ధరలకు ఇసుకను సరఫరా చేస్తే వినియోగదారులు అక్రమ మార్గాలపై ఆధారపడాల్సిన అవసరం ఉండదని పేర్కొన్నారు.

ఖనిజాల క్వారీలకు జరిమానాలు – అలాగే వేగంగా టెండర్లు

గతంలో ఖనిజ క్వారీలకు విధించిన జరిమానాల వసూళ్లపై సీఎం అధికారులను ప్రశ్నించారు.

పెండింగ్‌లో ఉన్న ఖనిజాల మైనర్ బ్లాక్‌ల వేలానికి వెంటనే టెండర్లు పిలవాలని ఆదేశించారు.

సమావేశంలో ముఖ్య వ్యక్తుల పాల్గొనింపు

ఈ సమీక్ష సమావేశంలో ముఖ్యమంత్రి సలహాదారు వేం నరేందర్ రెడ్డి, టీజీఎండీసీ ఛైర్మన్ ఈరవత్రి అనీల్, ఇతర ఉన్నతాధికారులు పాల్గొన్నారు.